Psalms 51

A niaring upi ra pupupun vue

Kai nina i lue ra kakailai, a kakailai kai David, ba Natan ra propet i ga tadav ia, ba i ga ruk tadav Bat-Seba.

1God, una mari iau, vardada ma kaum varmari ta;
Varogop ma kaum pepeal na varmari una pun vue kaugu lavur varpiam;
2Una dalu vakakit vue kaugu varpiam,
Ma una dur vue kaugu nirara kan iau.

3Tago iau nunure kaugu lavur varpiam,
Ma kaugu nirara i tur vatikai ta ra luaina matagu.
4Iau tar pait ra kaina piram, ia kaka piram,
Ma iau tar pait nam ba i bilak ta ra luaina matam,
Upi una takodo ba u tatata,
Ma una langalanga ba u varkurai.
5Ea, di ga kava iau ta ra bilak na mangamangana,
Ma tinagu i ga lalau pa iau ma ra varpiam.

6Ea, u mainge ra dovot na bala,
Kari una vaminana iau ara ta ra nuknukigu iat.
7Una vagomgom iau ma ra isop, ma ina gomgom,,
Una dalu iau, ma ina pua kakit ma ra kabang pata.
8Una tul tar iau, ba ina tadav ra gugu ma ra gina,
Upi ra urugu na lagar mulai, nina ba u ga bubur gigi diat.
9Una ive ra matam kan kaugu lavur nirara,
Ma una pun vue kaugu lavur varpiam par.

10Una vaki tar ra gomgom na nuknuk tagu, God;
Ma una pait vakalamane ra takodo na ninunuk tagu.
11Koko una okole vue iau kan ra matam,
Ma koko una tak vue ra takodo na tulungeam kan iau.
12Una tul tar mule ra gugu tagu, a gugu ta kaum valavalaun,
Ma una maravut iau ma ra pok na nuknukigu.
13Ona damana, ina tovo tar kaum lavur mangamangana ta ra umana tena varpiam,
Ma ra umana tena vana rara diat a vana tapuku piram.
14God, u God a vunapai kaugu valaun,
Una valaun iau kan ra vartakun na vardodoko;
Ma ra karameagu na manga kakailai ure kaum mangamangana takodo.

15Luluai, una papa ra bul na ngiegu,
Ma ra ngiegu na vaarike kaum pite varpa.
16Tago pa u kaina upi ra tinabar;
Gala u mainge, gala ina ga tar ia tam;
Vakir u ga ta ra tinabar di tun tar ia.
17Ba i takunuan ra nuknuk i dat, ia nam ra tinabar God i mainge,
Ba i takunuan ma ba i nukpuku ra bala i vevet, God, pa u pidimuane.

18Una mal Sion vardada ma kaum bo na mamainga.
Una liplip bat Ierusalem.
Damana una gugu ta ra umana tinabar di tul tar ia ma ra takodo na mangamangana,
Ma ta ra tinabar di tun tar ia, a kidoloina ka;
Damana da tul tar ra umana bulumakau ta kaum uguugu na vartabar.
19